Kungani?

Kungani?, Kungani? Kwenzenjani?
Mhlaba esiphila kuwo usujikile
Inhloniph'uthando nozwelo, kushabalele
Unembez'uphelil'ebantwini.
Bheka-nje, obaba bethu uma besibuka babona izintombi,
Omalume nabo bazibonela izintombi.
Kaze nembeza wayaphi? Buya phela, buya manje!!

Namuhla sife siphila,Wo hhe! Imali yimpande yesono.
Umzal'udayisa ngengane yakhe kumuntu,
Ayenze yonk'int'ayithandayo
Angan'ubab'uzohola nje!!!
Buya Phunga, buya Mageba, sekonakele kwelakho.

Umama uhambile, uyofun'isinkwa sabantwana,
Ubaba usala no "NKOSIKAZI-NDODAKAZI" yakhe,
Ithi ingakhala ingane, ithenjiswe ukufa.
Namuhla le ngane iphenduke umama kamfowabo
Iphenduke umnakwaboka mama wayo oyizalayo.
Kaze nembeza wayaphi?

Omama la ngaphandle, bakhohlakele
Abanal'uthando lwezingane zabo.
Isoka lika mama thizeni
Linukubeza indodakazi yalo mama,
Ikhale ingane ithi
"Mama isoka lakho liyanginukubeza"
Wo hhe! Kubuhlungu ukuba yintombazane,
Umama uvele waphendula wathi,
"Mntanami, ungambophi, sidla ngaye lo muntu"
Kungenani uma labo plastic bengezungena
Uma kungukuthi bazongena ngengane na?

Isabelo sami.

Ngizobhala inkondlo ngenxa yesimo engikuso,
ngibhale inkondlo ngenxa yezinto ezenzekayo,
engizibonayo nengizizwayo.
Isisusa saleyo nkondlo nguwe, nguwe ngokusemthethweni.
Wena skhohlakali, wena sela lenhliziyo yam.

Sengibabonile bonke, kodwa ongathatha eyakho indawo
kweyami inhliziyo, cha, angimbonanga,
Uma ngithuli ngicabanga ngawe, kuvele kwehle
Impophoma kobami ubuso. Kugeleza izinyembezi njeee
Akusonyembezi kepha izinyembezi zothando,
Izinyembezi zenjabulo, lenjabulo engaka mntanomuntu
Eyakuba khona kwakho kulo mhlaba, eyakwazana nawe,
Eyokuba seduze kwakho, injabulo yokunethezeka
Nokuthol'uthando othandweni engikulo.

Wena uyisipho sami
Kuzo zonke izipho ezikhona, wena uyizo zonke kimi
Uma nginawe angidinge lutho
Phela wena uyikho konke kimi.